Karthikeya 2 : కార్తికేయ 2 సినిమా టీమ్‌కు ఇస్కాన్ ప్రధాన కార్యాలయం నుండి ప్రత్యేక ఆహ్వానం !
చందు మొండేటి (Chandu Mondeti) దర్శకత్వంలో నిఖిల్ కథానాయకుడిగా గతంలో వచ్చిన 'కార్తికేయ' (Karthikeya) సినిమా మంచి విజయం సాధించిన సంగతి తెలిసిందే. ఇప్పుడు దాదాపు 8 సంవత్సరాల తర్వాత, ఇదే చిత్రానికి సీక్వెల్ తీయడానికి సిద్ధమయ్యారు నిర్మాతలు. అనుపమా పరమేశ్వరన్ (Anupama Parameswaran) కథానాయికగా, నిఖిల్ కథానాయకుడిగా నటిస్తున్న 'కార్తికేయ'సీక్వెల్‌ను పూర్తిగా కొత్త కథతో తెరకెక్కించారు. త్వరలోనే ఈ చిత్రం ప్రేక్షకుల మందుకు రానుంది.
ఈ మధ్యకాలంలో ఈ సినిమా ట్రైలర్‌ను సోషల్ మీడియాలో రిలీజ్ చేశారు. కృష్ణుడు ఏలిన ద్వారకా నగర రహస్యాల నేపథ్యంలో ఈ సినిమాను తెరకెక్కించినట్లు తెలుస్తోంది. పాన్ ఇండియా లెవెల్‌లో విడుదల అవుతున్న ఈ చిత్రానికి ఇటీవలే ఇస్కాన్ ప్రధాన కార్యాలయం నుండి ఒక ప్రత్యేక ఆహ్వానం వచ్చిందట.
కొత్త వీడియో రిలీజ్
ఈ విశేషాలను పంచుకుంటూ హీరో నిఖిల్ ఓ వీడియో రిలీజ్ చేశారు. "మా కార్తికేయ 2 (Karthikeya 2) టీమ్‌కు బృందావన్‌లోని ఇస్కాన్ ప్రధాన కార్యాలయం నుండి ఆహ్వానం అందడం ఎంతో ఆనందంగా ఉంది. వారు ఈ సినిమా గురించి మరిన్ని వివరాలు తెలుసుకోవాలని భావిస్తున్నారు.
అలాగే మమ్మల్ని భక్తులతో మాట్లాడించేలా ప్రణాళిక సిద్ధం చేస్తున్నారు. ఈ క్రమంలో మేం ఈ సినిమాకు సంబంధించిన మరో టీజర్‌ను ఇస్కాన్ ఆలయంలోనే రిలీజ్ చేయడానికి సంకల్పించాము. అలాగే సినిమా విడుదల తేదిని కూడా అక్కడే ప్రకటిస్తాం" అని నిఖిల్ (Nikhil) ఈ వీడియోలో తెలిపారు.
ఈ వీడియోతో పాటు ఇస్కాన్ సంస్థ పంపిన ఉత్తరాన్ని కూడా సామాజిక మాధ్యమాలలో షేర్ చేశారు నిఖిల్ (Nikhil). ఇస్కాన్ లాంటి సంస్థ ఇలా తమ సినిమా గురించి మాట్లాడాలనుకోవడం తమకు చాలా సంతోషాన్ని కలిగించిందన్నారు.
Read More: "ఆజ్యం అక్క‌డ మ‌ళ్లీ మొద‌లైంది".. ఉత్కంఠభరితంగా కార్తికేయ 2 ట్రైలర్ !
