చరణ్ (Ram Charan) ఎంట్రీ సీన్‌ను షూట్ చేసేసిన సుకుమార్ (Sukumar).. ‘ఆర్ఆర్ఆర్’ రిలీజ్‌కు ముందే షూటింగ్!
మెగా పవర్ స్టార్ రామ్ చరణ్ (Ram Charan) కెరీర్‌లో ‘రంగస్థలం’ సినిమా చాలా ప్రత్యేకంగా నిలిచింది. ఈ సినిమాతో చరణ్‌లో దాగి ఉన్న విభిన్నమైన నటుడ్ని ప్రేక్షకులకు పరిచయం చేశారు సుకుమార్ (Sukumar). ఈ మూవీతో వీరిద్దరిదీ క్రేజీ కాంబోగా మారింది. గ్రామీణ నేపథ్యంలో సాగే మాస్ ఎంటర్‌టైనర్‌గా రూపొందిన ‘రంగస్థలం’ చిత్రం అప్పట్లో బాక్సాఫీస్ వద్ద మెగా హిట్‌గా నిలిచింది. దీంతో చరణ్–సుకుమార్ కాంబినేషన్‌లో మరో సినిమా ఎప్పుడు వస్తుందా అని అందరూ ఎదురు చూస్తున్నారు. ఈ నేపథ్యంలో వీరి కలయికలో ఓ సరికొత్త ప్రాజెక్టు పట్టాలెక్కినట్లు తెలుస్తోంది.
చరణ్–సుకుమార్ కొత్త ప్రాజెక్టుకు సంబంధించి ఇప్పటికే హీరో ఇంట్రడక్షన్ సీన్స్ కూడా చిత్రీకరించారని తెలిసింది. ఈ విషయాన్ని తాజాగా ఇచ్చిన ఓ ఇంటర్వ్యూలో ప్రముఖ ప్రొడక్షన్ డిజైనర్ సాబు సిరిల్ రివీల్ చేశారు. ‘రామ్ చరణ్–సుకుమార్ కాంబినేషన్‌లో ఒక ప్రాజెక్ట్ రానుంది. ‘ఆర్ఆర్ఆర్’ (RRR Movie)లో చరణ్ శరీరాకృతి నచ్చడంతో సుకుమార్.. తన ప్రాజెక్టులోనూ చెర్రీని అదే లుక్‌లో చూపించనున్నారు. ‘ఆర్ఆర్ఆర్’ రిలీజ్‌కు ముందే పది నిమిషాలు నిడివి ఉన్న హీరో పరిచయ సన్నివేశాలను సుకుమార్ షూట్ చేశారు’ అని సాబు సిరిల్ వెల్లడించారు. ప్రస్తుతం ఈ వార్త సోషల్ మీడియాలో చక్కర్లు కొడుతోంది. దీనిని చూసిన చెర్రీ ఫ్యాన్స్ సంతోషంలో మునిగిపోతున్నారు.
‘ఆర్ఆర్ఆర్’ ప్రమోషన్స్‌లో భాగంగా ఓ ఇంటర్వ్యూలో సుకుమార్–చరణ్ ప్రాజెక్టు గురించి రాజమౌళి చేసిన కామెంట్స్‌ను ఇప్పుడు అందరూ గుర్తు చేసుకుంటున్నారు. ఆ వీడియోను షేర్ చేస్తూ.. ‘ఆయన అప్పుడే చెప్పాడు. మనమే అర్థం చేసుకోలేకపోయాం’ అని మెగా ఫ్యాన్స్ అనుకుంటున్నారు. ఇకపోతే, రామ్ చరణ్ ప్రస్తుతం శంకర్ దర్శకత్వంలో తెరకెక్కుతున్న మూవీ షూటింగ్‌లో బిజీగా ఉన్నారు. ఈ ప్రాజెక్టు పూర్తయిన తర్వాత గౌతమ్ తిన్ననూరితో ఆయన ఒక మూవీ చేయాల్సి ఉంది. కానీ ఆ ప్రాజెక్టు నిలిచిపోయింది. ఇక, మరోవైపు ‘పుష్ప 2’ పనుల్లో సుకుమార్ ఫుల్ బిజీగా ఉన్నారు. దీంతో వీరిద్దరి కాంబోలో వచ్చే సినిమా రెగ్యులర్ షూటింగ్‌కు చాలా సమయం పట్టేలా ఉంది.
