Sita Ramam: ‘సీతారామం’ డిలీట్ సీన్ రిలీజ్.. ‘నా దేశం ప‌రువును మీతో పంప‌లేను కదా’ అని ఎవ‌ర‌న్నారంటే..
టాలీవుడ్‌లో ఇటీవలి కాలంలో బ్లాక్ బాస్ట‌ర్ హిట్ సాధించిన సినిమాల్లో ‘సీతారామం’ (Sita Ramam) కూడా ఒక‌టి. 'యుద్ధంతో రాసిన ప్రేమ క‌థ' అనే హ్యాష్ ట్యాగ్‌కు త‌గ‌ట్టుగానే ద‌ర్శ‌కుడు హ‌ను రాఘ‌వ‌పూడి ఈ సినిమాను తెరకెక్కించారు. వైజయంతీ మూవీస్ సమర్పణలో స్వప్న సినిమా బ్యానర్‌‌పై అశ్వినీదత్ 'సీతారామం' సినిమాను నిర్మించారు.
ఈ సినిమాలో రష్మిక మంద‌న్న కాస్త నెగటివ్ టచ్ ఉన్న పాత్రలో న‌టించి మెప్పించారు. తాజా సమాచారం ప్రకారం, ఈ సినిమాలో డిలీట్ చేసిన ఓ సీన్‌ను నిర్మాతలు మళ్లీ రిలీజ్ చేశారట. ప్రస్తుతం ఆ సీన్ సోషల్ మీడియాలో వైరల్ అవుతోంది.
కలెక్షన్ల మోత
మ‌ల‌యాళ స్టార్ హీరో దుల్కర్ సల్మాన్, మృణాల్ ఠాకూర్ జంట‌గా న‌టించిన 'సీతారామం' చిత్రం ఆగ‌స్టు 5 తేదిన విడుద‌లైంది. ఈ సినిమా రిలీజ్ అయిన తొలి రోజు నుంచే థియేట‌ర్ల‌ను షేక్ చేస్తోంది. తెలుగు, త‌మిళం, మ‌ల‌యాళ భాష‌ల్లో సూపర్ డూప‌ర్ హిట్‌గా నిలిచింది. ఈ సినిమాను ఇటీవలే హిందీలో డ‌బ్ చేసి రిలీజ్ చేశారు. బాలీవుడ్‌లోనూ 'సీతారామం' సినిమా కలెక్షన్ల సునామీ సృష్టించింది.
డిలీట్ సీన్ ఏంటంటే?
ఈ చిత్రంలో రష్మిక పాకిస్థాన్ అమ్మాయి పాత్రలో న‌టించింది. తన ఆస్తి వివాదాన్ని పరిష్కరించుకొనే క్రమంలో ఆమె ఇండియాకి వస్తుంది. అయితే ఆమె సమస్యతో ఓ అందమైన ప్రేమకథ కూడా ముడిపడి ఉంటుంది. ఆ కథలో భాగంగానే సీత అనే ఆమెను కలిసి, ఓ ఉత్తరాన్ని అందజేసే బాధ్యత రష్మిక మీద పడుతుంది. దీంతో సీతను వెతుక్కుంటూ హైదరాబాద్ చేరుకుంటుంది రష్మిక.
హైదరాబాద్‌లోని నూర్జ‌హాన్ ప్యాలెస్‌కు వ‌చ్చిన రష్మికకు, క్యాబ్ డ్రైవర్కు మ‌ధ్య ఓ ఆసక్తికరమైన సన్నివేశం ఉంటుంది. అయితే ఆ సీన్‌ను మేక‌ర్స్ డిలీజ్ చేశారట. ప్రస్తుతం అదే సీన్‌ను మళ్లీ రిలీజ్ చేశారు. ఈ విషయాన్ని సోషల్ మీడియా ద్వారా ప్రేక్ష‌కుల‌కు తెలిపారు. ఇంతకీ డిలీట్ చేసిన ఆ సీన్ ఏమిటంటే..?
ఓ టాక్సీ డ్రైవర్ రష్మిక మర్చిపోయిన బ్యాగ్‌ను, పాస్‌పోర్టును ఆమెను తిరిగి అందజేస్తాడు. ఆ డ్రైవర్కు బదులిస్తూ 'ఇండియాలో కూడా నీలాంటి వాళ్ళున్నార‌న్న మాట' అని అంటుంది రష్మిక. దానికి డ్రైవర్ బదులిస్తూ 'ఇండియాలో అంద‌రూ నాలానే ఉంటారు. మీ బ్యాగ్ తీసుకెళ్లి, నా దేశం ప‌రువును మీతో పంప‌లేను కదా మేడం’ అని జవాబిస్తాడు. ఈ సీన్‌ను మేక‌ర్స్ తొలుత డిలీట్ చేశారు. ఇప్పడు మళ్లీ రిలీజ్ చేశారు.
Read More: ఓటీటీలోకి దుల్కర్ సల్మాన్ (Dulquer Salman) ‘సీతారామం’ సినిమా.. స్ట్రీమింగ్ ఎప్పటి నుంచి అంటే?
