Brahmastra : రణ్‌బీర్ కపూర్, నాగార్జున నటిస్తున్న 'బ్రహ్మాస్త్ర' సినిమాకి.. చిరంజీవికి కనెక్షన్ ఏమిటి ?
బాలీవుడ్ చరిత్రలోనే అత్యధిక బడ్జెట్‌తో నిర్మిస్తున్న 'బ్రహ్మాస్త్ర' (Brahmastra) మొదటి భాగం చిత్రం గురించే ఇప్పుడు ఎక్కడ చూసినా చర్చ. అయాన్ ముఖర్జీ దర్శకత్వం వహించిన, ఈ భారీ వీఎఫ్‌ఎక్స్ చిత్రంలో రణబీర్ కపూర్, అలియా.. వీరిరువురూ జంటగా నటించారు.
ఎస్ ఎస్ రాజమౌళి సమర్పణలో ఈ సినిమా హిందీతో పాటు తెలుగులో కూడా విడుదల కానుంది. ఇటీవలే రణ్‌బీర్ కపూర్, రాజమౌళితో కలిసి.. ఈ సినిమా ప్రమోషన్లలో భాగంగా విశాఖపట్నం వచ్చారు.
ఇక ఇదే సినిమాకి సంబంధించిన లేటెస్ట్ అప్డేట్ ఒకటి సోషల్ మీడియాలో బాగా సర్క్యులేట్ అవుతోంది. మెగాస్టార్ చిరంజీవి కూడా ఈ 'బ్రహాస్త్ర' (Brahmastra) చిత్రానికి సంబంధించి ఒక కీలక పాత్ర పోషిస్తున్నారట.
చిరంజీవి పవర్‌ఫుల్ వాయిస్‌కి ఫ్యాన్స్ ఫిదా
అవును నిజమే.. మెగాస్టార్ చిరంజీవి (Chiranjeevi) ఈ చిత్రానికి తన గాత్రాన్ని అందించారు. ఇదే విషయాన్ని ఉద్దేశిస్తూ దర్శకధీరుడు రాజమౌళి ఓ యూట్యూబ్ వీడియోని విడుదల చేశారు. పౌరాణిక పాత్రలతో కూడిన యాక్షన్ అడ్వెంచర్ సినిమాగా 'బ్రహ్మాస్త్ర' ప్రస్తుతం టాక్ ఆఫ్ ది ఇండస్ట్రీగా మారింది.
బ్రహ్మాస్త్ర పై భారీ అంచనాలు
అమితాబ్ బచ్చన్, మౌని రాయ్, డింపుల్ కపాడియా, దివ్యేందు శర్మ ఈ చిత్రంలో ముఖ్య పాత్రలు పోషిస్తున్నారు. అలాగే షారుఖ్ ఖాన్ కూడా ఒక చిన్న పాత్రలో నటిస్తారని ఆ మధ్య ఓ టాక్ వచ్చింది. స్టార్ స్టూడియోస్, ధర్మ ప్రొడక్షన్స్, ప్రైమ్ ఫోకస్ & స్టార్‌లైట్ పిక్చర్స్ సంయుక్తంగా ఈ చిత్రాన్ని నిర్మిస్తున్నాయి.
ప్రీతమ్ ఈ చిత్రానికి సంగీతాన్ని అందివ్వడం విశేషం. హిందీతో పాటు తమిళం, తెలుగు, మలయాళ భాషలలో సెప్టెంబర్ 9, 2022 తేదిన ఈ చిత్రం థియేటర్లలో విడుదల కానుంది. దాదాపు రూ. 300 కోట్ల భారీ బడ్జెట్‌తో ఈ సినిమాని తెరకెక్కిస్తున్నారు.
