Major : ఓటీటీలోకి అడివి శేష్‌ హీరోగా నటించిన ‘మేజర్’? స్ట్రీమింగ్ ఎప్పటి నుంచి అంటే

టాలీవుడ్ యంగ్ హీరో అడివి శేష్ హీరోగా న‌టించిన సినిమా ‘మేజ‌ర్‌’ (Major). శ‌శికిర‌ణ్ తిక్కా దర్శకత్వం వహించిన ఈ సినిమా కొద్దిరోజుల క్రితం విడుదలై హిట్‌ టాక్‌ను సొంతం చేసుకుంది. 26/11 ముంబై బాంబు దాడుల్లో అమ‌రుడైన మేజ‌ర్ సందీప్ ఉన్నికృష్ణన్ జీవిత క‌థ ఆధారంగా ఈ సినిమా తెర‌కెక్కింది.

మేజ‌ర్ పాత్రలో అడివి శేష్ నటన అందరినీ అలరించింది. శేష్ న‌ట‌న‌కు విమర్శకుల ప్రశంసలు కూడా లభించాయి. మేజర్‌‌ సినిమా బాక్సాఫీస్ ద‌గ్గర భారీ క‌లెక్షన్లు సాధించింది. ఈ సినిమా నిర్మాతలకు మంచి లాభాలే తెచ్చిపెట్టింది. తాజాగా ఈ సినిమా ఓటీటీలో కూడా విడుదలై అలరించబోతోంది. ప్రముఖ ఓటీటీ సంస్థ నెట్‌ఫ్లిక్స్‌లో జూలై 3 నుంచి ‘మేజ‌ర్’ సినిమా స్ట్రీమింగ్ కానున్నట్లు మేక‌ర్స్ అధికారికంగా ప్రకటించారు.

30 రోజుల తర్వాతే..

థియేట‌ర్‌లో విడుద‌లైన 30 రోజుల‌ తర్వాత మేజర్ సినిమా ఓటీటీలో విడుదల కాబోతోంది. జీఎంబీ ఎంట‌ర్‌‌టైన్‌మెంట్స్, సోనీ పిక్చర్స్ ఫిల్మ్స్ ఇండియా, ఏ ప్లస్ ఏయ‌స్ మూవీస్ సంస్థలు సంయుక్తంగా ‘మేజర్‌‌’ సినిమాను నిర్మించాయి. అడివి శేష్‌కు జోడీగా సాయి మంజ్రేక‌ర్ న‌టించింది.

ప్రకాష్ రాజ్‌, రేవ‌తి, శోభిత ధూళిపాళ ‘మేజర్‌‌’ (Major) సినిమాలో కీల‌క పాత్రలు పోషించారు. ప్రస్తుతం అడివి శేష్.. హిట్-2, గూఢచారి 2 సినిమాల్లో నటిస్తున్నారు. హిట్‌2 సినిమా షూటింగ్ పూర్తి కాగా, పోస్ట్ ప్రొడ‌క్షన్ ప‌నులు శరవేగంగా జ‌రుగుతున్నాయి. గూఢచారి-2 ప్రీ ప్రొడ‌క్షన్ ప‌నులు జరుగుతున్నాయి.

Read More : మహేష్‌బాబు (MaheshBabu) – రాజమౌళి కాంబో సినిమాపై ఇంట్రెస్టింగ్ అప్‌డేట్స్.. అడ్వంచరస్ థ్రిల్లర్‌‌గా మూవీ