9 అవర్స్ (9 Hours) వెబ్ సిరీస్ ద్వారా ఓటీటీలోకి ఎంట్రీ ఇవ్వ‌బోతున్న‌ డైరెక్ట‌ర్ క్రిష్!

డిస్నీ ఫ్లస్ హాట్ స్టార్ (Disney Plus Hotstar) ఓటీటీ మరో ఆస‌క్తిక‌ర‌ వెబ్ సిరీస్ ను ప్రేక్షకుల ముందుకు తీసుకురాబోతోంది. '9 అవర్స్' (9 Hours) పేరుతో తెరకెక్కుతున్న ఈ వెబ్ సిరీస్ కు టాలీవుడ్ ప్రముఖ దర్శకుడు క్రిష్... షో రన్నర్ గా వ్యవహరిస్తుండటం విశేషం. నంద‌మూరి తారకరత్న, న‌టులు అజయ్, వినోద్ కుమార్, మధు షాలినీ, రవి వర్మ, ప్రీతి అస్రానీ తదితరులు ఈ వెబ్ సిరీస్ లో కీలక పాత్రల్లో నటిస్తున్నారు. కాగా, ఈ సీరీస్ ను ఫస్ట్ ఫ్రేమ్ ఎంటర్ టైన్ మెంట్స్ పతాకంపై రాజీవ్ రెడ్డి వై, సాయిబాబు జాగర్లమూడి నిర్మిస్తున్నారు. ఈ వెబ్ సిరీస్ కు నిరంజన్ కౌషిక్, జాకోబ్ వర్గీస్ దర్శకత్వం వహిస్తున్నారు. పీరియాడికల్ డ్రామాగా రూపొందుతున్న ఈ వెబ్ సిరీస్ డిస్నీప్ల‌స్ హాట్ స్టార్ లో జూన్ 2 వ తేదీ నుంచి స్ట్రీమింగ్ కానుంది. జైలు శిక్ష అనుభవిస్తున్న ముగ్గురు ఖైదీలు ఓ భారీ దొంగతనానికి ప్లాన్ చేయడమనే పాయింట్ తో ఈ సిరీస్ రూపొందుతోంది. 

జైలు నుంచి తప్పించుకున్న ఆ ఖైదీలు ఓ బ్యాంకులోకి చొరబడిన తర్వాత జరిగే పరిణామాలు ఎలా ఉంటాయ‌నే పాయింట్ తో క్రైమ్ సస్పెన్స్ థ్రిల్లర్ గా రూపొందిస్తున్నారు. జైలు నుంచి తప్పించుకున్న ఆ ముగ్గురు బ్యాంక్ లోకి ఎలా చొరబడ్డారు, అక్కడ వాళ్లు అనుకున్న ప్లాన్ వర్కవుట్ అయ్యిందా.. ఒక‌వేళ వ‌ర్క‌వుట్ కాలేదంటే ఏం జ‌రిగింది. ఇంతలో పోలీస్ తీసుకున్న చర్యలేంటి అనేది ఈ వెబ్ సిరీస్ లో ఆసక్తికరంగా చూపించబోతున్నారు. కాగా, ఈ సిరీస్ ఫస్ట్ లుక్ పోస్ట‌ర్ (First Look)‌ గురువారం రిలీజ్ అయింది. ఈ పోస్ట‌ర్‌లో ద‌క్క‌న్ ఇంపీరియ‌ల్ బ్యాంక్ కోఠి 95 అనే బోర్డ్ ఆస‌క్తిని పంచుతోంది. చేతిలో తుపాకులతో ముసుగు ధరించి కనిపిస్తున్న కొందరు వ్యక్తులు ఇందులో ఉన్నారు. పోలీస్ డ్రెస్ లో వెన‌క్కి తిరిగిన మరొక వ్య‌క్తి ఇందులో కనిపిస్తున్నారు. ఆ వ్య‌క్తి ఎవ‌ర‌నే విష‌య‌మే ఆస‌క్తిని పంచుతోంది.

కాగా, ద‌ర్శ‌కుడు క్రిష్ ప్ర‌స్తుతం పవన్ కళ్యాణ్ (Pawan Klyan) హీరోగా నటిస్తున్న హరిహరవీరమల్లు చిత్రానికి దర్శకత్వం వహిస్తున్నారు. ప్రస్తుతం ఈ సినిమా షూటింగ్ జ‌రుపుకుంటోంది. ఈ గ్యాప్ లోనే క్రిష్ వెబ్ సిరీస్ తెర‌కెక్కించి త్వరలోనే డిజిటల్ ప్లాట్ ఫామ్ లోకి ఎంట్రీ ఇవ్వబోతున్నారు. ఆయనే షో రన్నర్ గా '9 అవర్స్' (9 Hours) పేరుతో ఈ వెబ్ సిరీస్ తెరకెక్కుతోంది. అయితే, ఈమ‌ధ్య‌ నిడివి కార‌ణంగా వెండితెర‌పై చూపించ‌లేని కొన్ని క‌థ‌ల్ని ప్రేక్షకులకు చూపించడానికి వెబ్ సిరీస్ లు చక్కటి మార్గంగా మారాయి. క‌రోనా వ‌ల్ల ఈ వెబ్‌సిరీస్ ల‌కు మంచి ఆద‌ర‌ణ పెరుగుతుండ‌టంతో అగ్ర ద‌ర్శ‌కులు సైతం వీటిని తెర‌కెక్కించేందుకు ఆస‌క్తిని చూపుతున్నారు.