Vaishnav Tej: షాపింగ్ మాల్ ఓపెనింగ్ లో సందడి చేసిన వైష్ణవ్ తేజ్, కృతి శెట్టి

Vaishnav Tej: టాలీవుడ్ లో ‘ఉప్పెన’ సినిమాతో హిట్ జంటగా క్రేజ్ తెచ్చుకున్నారు వైష్ణవ్ తేజ్, కృతి శెట్టి జంట. దీంతో టాలీవుడ్ బాక్సాఫీస్ దగ్గర ఈ జంటకు ఫుల్ డిమాండ్ ఉంది. చేసింది ఒక్క సినిమానే అయినా, ఆ సినిమాతో భారీ స్టార్ డమ్ రావడం.. ఈ జంటకు బాగా కలిసి వచ్చింది. అందుకే, ఈ జంట కోసం  సినీ నిర్మాతలు కూడా భారీగా పోటీ పడుతున్నారు. ఒక్క సినిమాల పరంగానే కాకుండా.. కమర్షియల్ యాడ్స్ పరంగా కూడా ఈ జంటకు బాగా గిట్టుబాటు అవుతోంది. ఈ మధ్య వీరికి.. పలు బ్రాండ్స్, షాప్ ఓపెనింగ్ వంటి ఆఫర్లు ఎక్కువగా వస్తున్నాయి. 

తాజాగా ఈ జంట ఒక మాల్ ఓపెనింగ్ చేసింది. నిజానికి ఆ మాల్ ఓపెనింగ్ కి స్టార్ హీరోయిన్ని పిలవాలనుకున్నారు. అయితే, ‘వైష్ణవ్ తేజ్-కృతి శెట్టి’ లకు యూత్ లో ఉన్న క్రేజ్ ని దృష్టిలో పెట్టుకొని, ఆ మాల్ యాజమాన్యం వీరిద్దరినీ ప్రత్యేకంగా ఆహ్వానించింది. పైగా భారీ రెమ్యునరేషన్ ను కూడా ఇచ్చినట్లు తెలుస్తోంది. సహజంగా యంగ్ హీరోలకు భారీ పారితోషికం ఇచ్చి.. మాల్స్ ను ఓపెన్ చేయించరు. కానీ, వైష్ణవ్ తేజ్ మాత్రం ఆ విషయంలో లక్కీనే. అయితే, ఈ మాల్ ఓపెన్ చేసినందుకు వైష్ణవ్ తేజ్, కృతి శెట్టి (Kriti Shetty) ఇద్దరిలో ఎక్కువ రెమ్యునరేషన్ అందుకుంది మాత్రం కృతి శెట్టినే. కృతి శెట్టి సాధారణంగా ఇలాంటి ఈవెంట్లకి ముప్పై లక్షల వరకు తీసుకుంటుంది. అయితే, ఈ మాల్ ఓపెనింగ్ కి మాత్రం నలభై వరకు తీసుకుందని టాక్. మొత్తానికి వైష్ణవ్ తేజ్, కృతి శెట్టికి హిట్ పెయిర్ గా బాగా డిమాండ్ క్రియేట్ అయింది. అందుకే, ఈ జంటని పెట్టుకుని ఓ లవ్ స్టోరీ చేయాలని దర్శకుడు విరించి వర్మ ప్రయత్నాలు చేస్తున్నాడు.   

కాగా, వైష్ణవ్ తేజ్ (Vaishnav Tej) ఇప్పటికే రెండు సినిమాలు ఒప్పుకున్నాడు. అలాగే కృతి శెట్టి చేతిలో కూడా ప్రస్తుతం నాలుగు సినిమాలు ఉన్నాయి. కాబట్టి.. ముందు ఒప్పుకున్న సినిమాలు పూర్తి అయ్యాకే.. వీరిద్దరి కలయికలో మరో సినిమా వస్తోంది. మరోవైపు.. గతేడాది ఉప్పెన సినిమాతో టాలీవుడ్‌కు పరిచయమైన ఈ ముద్దుగుమ్మ.. నాని శ్యామ్ సింగరాయ్, బంగార్రాజు సినిమాలతో వరుస విజయాలు అందుకొంది. దాంతో కృతి శెట్టి పేరు ఇప్పుడు టాలీవుడ్ లో మార్మోగిపోతోంది. ఈమె కోసం నిర్మాతలు కూడా క్యూ కడుతున్నారు. ఒక్కో సినిమాకు కోటి రూపాయలకు పైగా వసూలు చేస్తుంది ఈ బ్యూటీ. ప్రస్తుతం వరుస సినిమాలతో బిజీగా ఉంది ఈ కన్నడ కస్తూరి. 

సుధీర్ బాబు హీరోగా ఇంద్రగంటి మోహన కృష్ణ తెరకెక్కిస్తున్న ఆ అమ్మాయి గురించి మీకు చెప్పాలి.. లింగుస్వామి దర్శకత్వంలో రామ్ హీరోగా నటిస్తున్న ది వారియర్.. నితిన్ మాచర్ల నియోజకవర్గం సినిమాల్లో నటిస్తోంది కృతి శెట్టి (Kriti Shetty). ఇక ఇప్పుడు ఈ మూడు సినిమాలతో పాటు మరికొన్ని ప్రాజెక్టులు కూడా ఈమె ఓకే చేసే పనిలో పడింది. మరీ ముఖ్యంగా ఈమెకు ఇష్టమైన హీరోతో నటించే అవకాశం వచ్చినట్లు ప్రచారం జరుగుతుంది. టాలీవుడ్ లో కృతి శెట్టి మనసు దోచిన ఆ హీరో ఎవరో కాదు.. రామ్ చరణ్. ఉప్పెన సినిమా సమయంలోనే ఈ విషయం గురించి ఓపెన్ అయింది కృతి శెట్టి.